كيف تكون مميزا في دينك؟؟؟

الي احبائي ف الله
جئت اليكم اليوم بعد غياب ..لاكتب اليكم فكرة اتاني بها اخ عزيز احبه ف الله مثلما احبكم
ولقد اتت الفكرة دنياوية ..ولكنني فكرت بها وقررت ان اجعلها دينية
وموضوعنا اليوم هو (( الخمس خصال المؤدية للكمال ))
ولا يستعجب احد وكونو معي وسأثبت لكم
قال أمير المؤمنين كرم الله وجه: (( أوصيكم بخمس لو ضربتم إليها آباط الإبل لكانت لذلك أهلاً : لا يرجون أحد منكم إلا ربه , ولا يخافن إلا ذنبه ,ولا يستحين أحد إذا سئل عما لايعلم أن يقول :لا أعلم , ولا يستحين أحد إذا لم يعلم الشئ أن يتعلمه.
وعليكم بالصبر ,فإن الصبر من الإيمان كالرأس من الجسد , ولا خير في جسد لا رأس معه , ولا في إيمان لا صبر معه ))
فهيا معي اولاً قبل أن نخوض في تفسير هذه الوصية ..أن نتخيل معاً ماذا يمكن ان يكون لو حاول كل انسان منا وسابر في تحقيق هذه الصفات
من وجهه نظري انه سيكون انسان نادر الوجود ..وسيكون ذو اخلاق بكل معني الكلمة .. فهذه الصفات فعلاً تسعي للكمال رغم انه مستحيل الوجود لانه ليس كامل الا رب الوجود
فهيا معي الآن الي تفسير الوصية
*يقول إمامنا في اولي هذه الصفات
((لايرجون أحد منكم إلا ربه))
وذلك بمعني ان يوجه الانسان طلبه الي الله عز وجل ,ولكن ليس معني ذلك ان يمتنع عن الطلب الي الناس ,ولكن يكون عند يقين بالله ان ما سوف يحدث هو الخير له
* الصفة الثانية
((ولا يخافن إلا ذنبه ))
ومعني ذلك انه علينا ان نخاف من ذنوبنا ونحاول ان نخفف منها ولا نرتكب الكثير من الذنوب
بالرغم من ان الانسان ليس خالي من الذنوب ,ولكن خير الخطائين التوابين , ومن يخشي ذنوبه يصير من التائبين باذن رب العالمين
*الصفة الثالثة
(( ولا يستحين أحد إذا سئل عما لا يعلم ان يقول لا اعلم ))
ومعني ذلك انه ليس من العيب انك إذا سئلت وكنت لا تعلم ان تقول ذلك .. ولكن العيب أن ينطق لسانك بالخطأ وتوصل لمن يسألك معلومات غير صحيحة .. وإن صدقك في مرات فإن أمرك سينكشف في مرة منهم .. وهو انك لا تعلم شيئاً مما تقوله
* الصفة الرابعة
((ولا يستحين أحد إذا لم يعلم الشئ أن يتعلمه ))
بمعني ان الانسان حين يعرف عن نفسه انه لايعلم شيئاً ما , يجب ان يسرع ويتعلمه , حتي لا يكون من المتظاهرين بالعلم وهم لا يعلمون شيئاً
* الصفة الخامسة
(( وعليكم بالصبر فإن الصبر من الإيمان كالرأس من الجسد , ولا خير في جسد لا رأس معه , ولا في إيمان لا صبر معه ))
بمعني انه يجب علي الانسان ان يكون صبوراً حليماً عند نزول المصائب به ولا يمل فإن من يمل يضيع عليه الاجر والثواب للصابرين والصابرات,.
وهذ آخر الوصية , وآخر الكلام
وهذه الصفات الخمس ما أجتمعت في إنسان ألا وجعلت منه انسان عالي المقام , ووصلت به إلي قمة الشرف
واتمني ان يكون هذا الكلام قد افادكم ,, والله المستعان عليه وهو ولي التوفيق

رحاة في دماغ الرجل

اذا كانت لديك شكوك في أن الرجال يواجهون صعوبات في فهم المرأة فأنت واهمة، هم حقيقة لا يتقنون هذا الفن إطلاقا إلا نادرا!!
هناك فرق في التكوين بين الرجل والمرأة بحيث يصبح من الصعب على الرجل أن يدرك تماما ما يدور في ذهن المرأة أو كيف يتعامل مع المرأة. فالرجل منذ أن يبدأ بالإدراك في مرحلة الطفولة يبدأ بالبحث عن الإثارة التي تتناسب مع كل موقف يتعرض له في حياته. و يبدأ بالتفكير كيف سيستمتع اكثر ويحقق مزيد من الإثارة في كل موقف من مواقف حياته.
هذه هي طريقة حياة الرجال وهي مورثة معهم منذ بدأ الخليقة وتسري في دمائهم وجيناتهم!! حالما يصل الذكر سن البلوغ يبدأ بالاهتمام بالجنس الآخر ويظن أن أسلوب حياته وتعامله مع باقي المواقف في حياته ينطبق على النساء أيضا.
عندها يدرك الذكر أن رد الفعل الفيزيائي والحسي لا يأتي بنفس النتيجة وبنفس الأثر الذي يحدثه في تعامله مع باقي مواقف حياته الأخرى. فمثلا إذا أراد أن يصحح موقفه أو يعتذر يقوم بفعل شيء كأن يشتري هدية دون أن يدرك أن حاجة المرأة هي حاجة عاطفية وان إصلاح الموقف لا يتطلب أي فعل حسي بل مجرد الإحساس والتعاطف هو أمر كاف للمرأة.
هي تريد منه أن يتعلم التواصل معها عن طريق فهم أحاسيسها بينما هو يريدها أن تتجاوب معه و يتوقع منها ردود أفعال حقيقية ملموسة.
الرجل يقع في حيره حقيقة عندما يقوم بتصرف معين ولا يجد عند المرأة رد فعل حقيقي أو عندما لا تتجاوب معه كما كان يتوقع. الرجال عادة ما يواجهون الصعوبات عندما يتعلق الموضوع بحاجات المرأة العاطفية.
بالنهاية تحاول المرأة بذكائها الملفت أن توجه الرجل إلى الاتجاه الذي تريد عن طريق معرفة مفاتيح شخصيته بحيث تقوم هي بإيجاد التناغم والتفاهم لكي تستمر العلاقة. بهذه الطريقة يكون الرجل سعيدا كون المرأة تتفهم شخصيته وتكون هي سعيدة لأنها عرفت كيف تحقق التوازن في العلاقة.
هذا ومن جانب آخر، لقد اثبت العلم الحديث أن دماغ المرأة مختلف عن الرجل، فقد تبين أن دماغ الرجل اكبر بنسبة 10% من دماغ المرأة . إلا أن دماغ المرأة يحتوي على نهايات عصبية اكثر في بعض أجزاء الدماغ.
فمثلا عند الاستماع لأشخاص آخرين يستخدم الرجل نصف جانب واحد من الدماغ بينما تستخدم المرأة كلا الجزأين من دماغها أثناء القيام بنفس العملية.
والمرة الجاية هكون معاكم في رحلة لدماغ المرأة
علشان محدش يقول اني متحيزة لحد
بس للاسف هتطول شوية المرة دي
علشان امتحاناتي قربت ....هتوحشوني

ما يحكم الرجل والمرأة

طلب من مجموعة من النساء والرجال , ان يختاروا , في اطار دراسة حديثة , كلمات من لائحة كاملة , تعبر برأيهم عن القيم التي يعتمدونها في حياتهم أو التي يتمنون أن يعتمدوها , وقد وقع اختيار الرجال على الكلمات التالية مرتبة حسب اهميتها بنظرهم : ( الجرأة , السيطرة , السلطة , الاعجاب , الطرق العلمية ) .أما النساء فاخترن الكلمات التالية : ( الكرم , الانجذاب , العطاء , الدفء , العاطفة ).وفي الاطار ذاته , حاولت باحثة كندية ان تحدد بواسطة صور السكانر والتصوير بالرنين المغناطيسي , المنطقة الدماغية التي تحكم انفعالات الرجل والمرأة . وتبين لهما على اثر ابحاثهما ان هذه المنطقة تقع عند الرجل في منطقة معينة من دماغه الايمن , لكن أيدهش احداً أن يعلم ان هذه المنطقة منتشرة عند المرأة في نصفي الدماغ وانها لا تتمركز في مكان واحد بل تتواجد في اجزاء الدماغ كافة ؟اثناء شجار لا يبدي الرجل من انفعالاته الا نزراً يسيراً, وهذا امر طبيعي لان دماغه مجزء مرتب لا يستطيع ان يفعل ويفكر في الوقت عينه . لذلك نراه يعدد حججه بترتيب وانضباط شديد , حتى لو حاولت المرأة التي يعمل دماغها على الربط بين الافكار , جره الى موضوع اخر.احيانا يبدو انه فقد الاهتمام بالنقاش , لكنه يفعل ذلك لانه يحتاج فسحة يعيد فيها تنظيم افكاره , فجوابه ليس جاهزا للاعلان بعد.انه اشبه بالكومبيوتر عندما نعطيه مهمة ينجزها فتظهر شاشته صورة ساعة , ولا يبقى امامنا سوى الانتظار ,حتى ينطلق من جديد .اما المرأة , فهي تبكي وتشتم وتتهم وتدافع عن نفسها في آن معا .ولا عجب في ذلك , فهي تفكر وتتألم في الوقت عينه . وكلما فكرت بما يزعجها كلما كرهته . فهي تتوقع ان تكون الخاسرة , تلك التي تتراجع . واحيانا تخلط الامور ببعضها البعض , لماذا ؟ لانها بكل بساطة تفكر بشئ آخر , لم تتكلم عنه في حينه , لانها لم تشأ اثارة مشكلة , لكنها الان تذكره , فالمشكلة واقعة لا محالة ... وهي في هذا الوضع اشبه بالكومبيوتر عندما تظهر على شاشته صورة قنبلة .لا يبقى امامنا سوى ان نقطع التيار الكهربائي , ونبدأ كل شئ من جديد

تكلم عن نفسك

بسم الله الرحمن الرحيم

انا من كام يوم كده جالي تاج انما ايه زنقنى زنقة ما يعلم بيها الاربنا..ربنا يستر

*اولا:عشر حاجات عن نفسي اللي اصلا مبعرفش اتكلم عنها

1- بنوتة عادية خالص ..بحب الحياة..وبحب ربنا ومبحبش حد يسئ الظن بيا

2-ساعات بكون عصبية شوية لكن بجد ومش شكرانية ف نفسي ممكن اروق من كلمة

3-الحب ..كلمة تعنى لي الكتير لانها اهم حاجة في حياتى

4- أمي.. رضاها عني بالدنيا وما فيها حتي لو كان علي حساب نفسي ..بحبها

5 -ابويا .. بحبه اوي رغم اني ساعات بفتقده بسبب شغله

6- اخواتي ...والله لو قلت اني ممكن أجيب لهم نجمة من السما ممكن حد يقول عليا ببالغ لكن بجد بحبهم اوى

7- طموحاتي ..اهم شيئ نفسي احققه بعد الكليةاني ارتبط بانسان يتقي ربنا واكون كل حاجة في حياته وهو برضه هيكون كل حاجة في حياتى

8- مستقبلي ..نفسي احقق فيه كل حاجة واخلص الكلية واشتغل محاسبة..ده لاني ف كلية تجارة

9- موهبتي ..ولله الحمد عليها اني بكتب شعر وبرتاح لما بحس انه بيعجب الناس

10- واخيرا ..اهم حاجة اني بجد مبحبش اكون تقيلة علي حد فأتمني ما اكونش تقلت عليكم

أما بقي بالنسبة للخمسة

1/بنت النيل

2/واحد وبيتكلم

3/مدينة الملائكة

4/miss.sosa

5/آدم ويحيي

وعلي فكرة ماحدش يزعل مني اني ما اهدتش التاج ليه لانه مبعوت لهم قبل كده.. وانا عن نفسي نفسي ابعته للكل

الصمت..صمت الزوجة والزوج

بسم الله الرحمن الرحيم

موضوعنا انهارده هو
*صمت الزوجة
وهو ان تضطر الزوجة انها تجبر نفسها علي الصمت بالنسبة للخلافات الزوجية
وهنا بقي لازم نقول انه ما ينفعش الزوج يعتبر الزوجة مجرد أم للاولاد ومديرة بيت وبس
فهي قبل كل ده شريكته في حياته
ولازم نحاول نتأقلم علي بعض فأكيد بالعشرة إحنا عرفنا بعض وعرفنا ازاي ننهي مشاكلنا ونحلها
وماينفعش حد فينا يفضل ساكت ويتفرج عل اللي بيحصل وكأنه في المسرح
و لو فضلتى ساكتة هتملي وهو هيمل وهتبدأي تهملي دورك بسبب حالتك النفسية وهترمي كل حاجة عليه
وعلي فكرة الصمت ده مش بس هيقضي علي حياتك الزوجية ده ممكن يقضي علي حياتك كلها

*صمت الزوج
وده دايما بيكون بسبب ان الزوج بيكون عنده مشاكل ف الشغل او ف البيت ومش عايز يتكلم مع حد
وده بيزعج الزوجة جدا ويخليها تفتكر انه زعلان منها او انه هيسيب البيت وان المشاكل بينهم وصلت للدرجة دي
مع انه لو حكي لها ده هيفرحها وكمان هتتعاطف معاه وتحاول تحلها
وف الاخر علشان تتجنبوا كل ده فعليكي انك تفتكري دايما انه لما بيكون تعبان ومشغول في مشكلة بيكون عاوز هدوء
ودي طبيعته اللي مش هيعرف يغيرها لا علشانك ولا علشان الجن الازرق
ولازم كمان الراجل يفتكر دايما ان هي لما بتكون تعبانه ومتضايقة بتكون عايزة تتكلم وخرج اللي جواها علشان تحس بالرحة
ودي برضه طبيعتها ..ومش هتعرف تغيرها
ونصيحة بقي لوجه الله اننا لازم نحترم كلنا الطبيعة اللي خلقنا بيها ربنا ونتعامل معاها صح..علشان حياتنا تمشي صح

سلسلة المشاكل الزوجية واقتراحات لحلولها

بسم الله الرحمن الرحيم
والصلاة والسلام علي اشرف المرسلين ..سيدنا محمد الصادق الوعد الأمين..أما بعد
انهارده إنا جايه افتتح معاكم سلسلة يارب تكون نافعة لناس كتير وهي
سلسلة المشاكل الزوجية وحلها
وأول حاجة هتكلم عليها هي ((غضب الزوج والزوجة وكيفية امتصاص الغضب ده))
*خمس طرق لامتصاص غضب الزوج
1- لو غلطي في إي حاجة زى مثلاً انه يطلب منك حاجة وتتأخري عليه..ناديه بأحب الأسماء لقلبه واعتذري له واستحملي كل اللي هيقوله ..لأنه بكده هيكون فرغ جزء من غضبه
2- ابدأي أيديه من غير مقاطعة يعنى مثلاً قولي له ((معاك حق)) أنت صح..وبعد لما يهدي أبدأي اتكلمى معاه براحة وفهميه إن المشكلة صغيرة وكان ممكن تتحل بالتفاهم
3- حاولي طول ماانتي بتتكلمي معاه الابتسامة ماتفارقش وشك ..فدي تعتبر رسالة غير مباشرة لوقف العصبية ف البيت
4- ما تفكريهوش بالمشاكل اللي قبل كده لان ده هيستفزه اكتر ويكبر المشكلة وان كانت صغيرة
5- واخيراً..أوعي تنامي وهو زعلان منك..فبعد مالامور تهدي حاولي تصالحيه كما قال أبو الدرداء لام الدرداء رضي الله عنهما((إذا غضبت فاسترضيني وإذا غضبتِ أسترضيك)) وماتفكريش انه طالما زعل منك شوية يبقي خلاص والحب انتهي...الحياة لازم تكون حلوة ومرة

وده بقه نموذج من حياة سيدنا محمد عليه أفضل الصلاة والسلام لامتصاص غضب الزوجة

فقد روى أن السيدة حفصة قد ذهبت إلى أبيها فتحدثت عنده، فأرسل- النبي صلى الله عليه وسلم- إلى جاريته، فظلت معه في بيت حفصة، وكان اليوم الذي يأتي فيه (حفصة)، فرجعت حفصة فوجدتهما في بيتها، فجعلت تنتظر خروجها، وغارت غيرة شديدة، فأخرج- رسول الله صلى الله عليه وسلم- جاريته، ودخلت حفصة، فقالت: "قد رأيت من كان عندك، والله لقد سؤتني". فقال النبي- صلى الله عليه وسلم-: "والله لأرضينك، فإني مسر إليك فاحفظيه"، قالت: ما هو؟ قال: "إني أشهدك أن سريتي هذه عليّ حرام رضًى لك". (رواه الواقدي بسنده في الطبقات الكبرى عن ابن عباس). وما قال لها الرسول ذلك إلا مراعاةً لخاطرها وامتصاصًا لغضبها.
الصبر على أذى زوجاته:
كان رسول الله- صلى الله عليه و سلم- يصبر على أذى زوجاته وغضبهن عليه وهجرهن إياه ومراجعتهن له، فعن عمر بن الخطاب- رضي الله عنه- قال: "كنا معشر قريش نغلبُ النساء، فلمَّا قدمنا على الأنصار، إذا قومٌ تغلبهم نساؤهم، فطفق نساؤنا يأخذن من أدبِ نساء الأنصار، قال: فصخَبتُ على امرأتي فراجعتني، فأنكرت أن تراجعني، قالت: ولِمَ تنكر أن أراجعك؟ فوالله إنَّ أزواجَ النبي- صلى الله عليه وسلم- ليراجعنه، وإنَّ إحداهن لتهجره اليوم إلى الليل، قال: فأفزعني ذلك وقلتُ لها: قد خاب مَن فعل ذلك منهن، قال: ثم جمعتُ عليَّ ثيابي فنزلتُ فدخلت على حفصةٍ فقلت لها: أي حفصة، أتغاضب إحداكُنَّ النبي- صلى الله عليه وسلم- اليوم حتى الليل؟ قالت: نعم، قال: فقلت: قد خبتِ وخسرت، أفتأمنين أن يغضبَ الله لغضبِ رسوله- صلى الله عليه وسلم- فتهلكي؟..." (رواه البخاري).
وده بقه بدل ماتكون الحياة كده

هتكون وتبقي كده

واتمنى يكون الموضوع عجبكم

تحياتى لكم وبأذن الله اجيلكو ومعايا حلول لمشاكل تانية كتير...استنونى

تأثير الغلاء علي الزواج

بسم الله الرحمن الرحيم والصلاة والسلام علي اشرف المرسلين سيدنا محمد الصادق الامين اما بعد..انهارده انا جايه اكلمكو عن موضوع كان نفسي اكتب عليه من زمان اوي وبجد يا جماعة الموضوع ده تاعبنى شخصيا وهو(الغلاء) وبجد اكتر شئ تاعبنى هو حال الشباب ودول اكتلر ناس اتظلموا بجد ف الموضوع ده ومحدش المرة دي يقولي ازاى..لانهم بجد اتظلموا ف كل حاجة ف الشغل والعيشة وخاصة بقي الزواج وعايزين نحط عشرين خط تحت الكلمة دى

ولان ده موضوعنا انهارده وهو اد ايه الغلاء اثر علي الجواز..نبدا بقي

طبعا كلنا بنحب واللي محبش هيجيلوا يوم ويحب..بس ياتري كام واحد من اللي بيحبوا هيضمن انه يتجوز وخاصة ف الظروف اللي احنا فيها دي..يا جماعة الموضوع بجد يستاهل المناقشة بس ياتري هنلاقي له حلول!!!!!! والله موش عارفة..بس تلقائي كده..انا هقول اللي جوايا وهسيبكوا تحكموا عليه..يعنى مثلا لما شاب يشوف بنت مؤدبة ومحترمة وتعجبه وطبعا هيكون نفسه يتجوزها علشان هي ف نظرة انها هتصون بيته ..بس لما يجي يفكر يتجوزها ...عايز شقة وشبكة ومهر وتكاليف خطوبة وعفش وفسح ..الخ الخ

يعنى عايزله بنك مصر علشان يعرف يرتبط بواحدة..بس انا بقي عن نفسي ..نفسي اقول كلمة للاهالي ..يا جماعة ربنا مقلش كده ربنا عز وجل قال في كتابه الكريم (( وجعلنا لكم من انفسكم ازواجاً لتسكنوا إليها وجعل بينكم مودة ورحمة)) صدق الله العظيم

وانا بقي عايزة أركز علي المودة والرحمة بس للاهالي ..يعنى بقول ياريت نسهل الموضوع ع الشباب ..كده الشباب هتتعب اكتر ما هي تعبانة ..يعنى اذا جاءكم ذو خلق ودين فزوجوه..يعني ما بقولش رخص بنتك ولا بقولك دخلي بنتك بحاجات متليقكش بيها ..بس انا بطلب الرحمة..يعنى مفيش اي مانع ان لو اتقدم لبتنك انسان محترم ومتدين ..يبقي منعقدهاش عليه..يعنى منقولش شبكة بالشئ الفلانى والجرام دلوقتى بقي فوق ال100 جنيه.. يعنى هو هيجيب منين؟؟؟؟؟

وحتي لو معاه.. نعمل حسابنا انه لسه وراه شقة وفرشها ..يعني مثلا ممكن بلاش شبكة ويجيب دبلة ومحبس وخاتم

المهم الامااااااااااان..وبرضه اعمل فرح لبنتك ..وخلي بدل الشبكة يشيل عنك حاجة من اللي كنت هتجيبها وبرضه اكتبها ف قايمة بنتك.. وبلاش برضه التكاليف اللي ملهاش لزمة اللي ف الفرح ..وعارفة ان ناس كتيييير هتعارضني ف النقطة دي ..لكن بجد يا جماعة احنا ف وقتنا ده والغلا اللي بقينا فيه محتاجين اوى نحسبها ونفكر ف بكره..وبجد بلاش التكاليف الزيادة اوي دي ..يعنى العروسة برضه ممكن تجيب احلي فستان وتعمل اجمل ميكب ..بس ممكن برضه تعمل الفرح ف البيت وسط اهلها وبراحتها وكمان توفر التكاليف..لشهر العسل وتكاليف ما بعد الزواج.. وتكون رحيمة علي جوزها اللي ربنا وصاها عليه ووصاه عليها ومتكلفهوش فوق طاقته .. وتعيش علي قدها وتحمد ربها ..وتصبر معاه ع الحلوة والمرة..

وبأذن الله تكون حياتها معاه سعيدة..وصدقينى يا عروستى ماتحطيش ف دماغك انك طالما ماعملتيش زي البنات وجيبتي شبكة انه كده هيرخصك..!! ده بالعكس هيقدرك وهيحطك تاج فوق راسه انك راعيتي ظروفه..وسلامي لكل عروسة لسه بداه حياتها

وللحديث بقية....

الصلاة بمفهومها الصح

السلام عليكم ورحمه الله وبركاته اخواتي واخوتي ف الله

انا عارفة اني اتأخرت عليكم كتير شوية..لكن أعمل ايه بقي مشاغل..وانهارده انا جايه اتكلم معاكم ف موضوع مهم..لكن قبل ما اقول اي حاجة عايزة اعرف فين اقتراحاتكم وتعليقاتكم..مش احنا اتفقنا ولا ايه؟؟؟؟؟؟؟؟؟؟؟؟؟
المهم بقي انا انهارده جايه اتكلم معاكم عن الصلاة.. بس بمضومنها الاصلي مش ازاي نركع وازاي نسجد.......وده لان الصلاة ليها كذا جانب هيحتاج مننا اكتر من موضوع

وأول موضوع من المواضيع دي هو

1-احنا ليه بنصلي؟؟؟؟؟؟؟؟؟؟

لو حد كده سألك مرة وقلك انت ليه بتصلي؟ ياتري هتقوله ايه؟؟؟؟؟؟؟؟؟؟؟؟؟
انا لما سالت ..ناس قالتلي علشان ادخل الجنة ..وناس تانية قالتلي علشان ربنا..وناس تالتة تقولك علشان ربنا يسهلها معايا ف الدنيا..وحاجات تانية كتييييييييير

لكن بقي ما حدش عمره مثلا قالك مرة علشان نفسي ابقي زي سيدنا محمدصلي الله عليه وسلم او سيدنا ابو بكر او سيدنا عمر رضي الله عنهم جميعا

او اي واحد من الناس العظيمة دي اللي مهما نقول عليهم ما يكفيهمش كلام...ولا حتي حد قالي زي واحدة سألتها وعجبنى جدا ردها

قالتلي: علشان ربنا أمرني اني اصلي وعلشان انا برتاح لما بصلي..وهو ده برضه من ضمن الكلام المظبوط

بس مش معني كده ان كل اللي مش بيصلوا ناس مش كويسين..والاثبات علي ده ان سيدنا محمد صلي الله عليه وسلم قال:"لو لم تُذنبوا لذهب الله بكم وجاء بقوم يُذنبون ويستغفرون فيغفر الله لهم"

2-طيب بقي لو سألك حد انت ليه مش بتصلي ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
هتلاقي ناس بتقولك ..لما ربنا يهديني..وده ف ساعتها هرد عليه واقوله ان الله تعالي قال"أن الله لايغير ما بقوم حتي يغيروا ما بانفسهم"صدق الله العظيم

يعني لازم إنت اللي تغير من نفسك

وناس تانية تقولك..طول ما الشيطان موجود مش بعرف اصلي....؟؟؟؟؟؟؟؟؟؟؟؟؟؟

وناس تانية ممكن تقولك..ما حطتش الموضوع ده ف دماغي قبل كده بصراحة...يااااااااااااااه للدرجة دي وصل بينا الحال.......؟؟؟؟

طبعا بقي كلها حجج فارغة..اه فارغة..لانى كنت كده..ولما مالقيتش فايدة قولت لنفسي لأ بقي..ده انا كده ممكن اموت ف لحظة..ومعرفش ساعتها هيكون مصيري ايه..بس علي حالي ده اكيد هيكون صعب..فقررت اني اكون شئ كويس...انفع نفسي وانفع غيري..فعملت الخطوات دي وواحدة واحدة..والحمد لله بحاول أوصل اني اكون شئ مفيد..ومش هقول مبغلطش..طبعا بغلط لان كل ابن آدم خطاء

فهنتفق من دلوقتي ان الخطوات دي ممكن..ده اكيد..اننا هنحاول فيها مرة ومليون مرة وراها وراها لغاية لما تتحقق كلها وتتحقق صح..ولكن قبل الخطوات عايزين نتكلم شوية عن الصلاة نفسها

*امتي وفين اتفرضت الصلاة؟؟؟؟؟؟

فرض الله تعالي الصلاة بمكة ليلة الاسراء قبل الهجرة بسنة وذلك في وقتها علي كل مؤمن عاقل بالغ مستقبل القبلة ..والصلاة اهم ركن من اركان الاسلام لذا شُرعت في كل الاحوال..في الصحة والمرض والاقامة والسفر وعلي الميت

وحال جاحدها(كارهها) انه كافر ولا اعوذ باالله من الشيطان الرجيم

وأما من تركها كسلاً..فماذا حاله؟؟؟؟؟؟؟

حاله آنه آثم إثماً شديداً وعليه ان يتوب الي ربه ويقضي ما فاته منها

*دليل فريضتها

قال تعالي"وأقم الصلاة إن الصلاة تنهي عن الفحشاء والمنكر"صدق الله العظيم العنكبوت(45)

*شروط صحتها

الطهارة بالوضوء او بالغسل او التيمم.

ستر المُصلي لعورته وهي ف الرجل من السرة الي الركبة..وف المرأة جسدها كله ما عدا الوجه والكفين.

النية مع استقبال القبلة لقوله تعالي"ومن حيث خرجت فول وجهك شطر المسجد الحرام"صدق الله العظيم البقرة(149).

نيجي بقي للخطوات

اول خطوة:حاسب نفسك!!!!!!!!!!!!!!!!

يعني ايه احاسب نفسي.؟؟؟؟؟؟؟؟؟

يعني أقف معاها وقفه وأسألها سؤال بقالي كتيييييير ما سألتهوش وأقول لها

*ياتري انهارده ذكرتِ ربنا اول ما قومتي من النوم وقريتي اذكار الصباح والمساء؟؟؟بلاش دي

*طيب ياتري قولتِ اذكار الدخول والخروج من المنزل والمسجد والخلاء وعند الملبس والطعام.......الخ؟؟؟؟بلاش دي

*طيب بلاش كل ده..ياتري انت انهارده صليت الفجر..او حتى الصبح

*طيب ياتري حمدت ربنا علي نعمة الاسلام ودعيته انه يثبت قلبك علي دينه؟؟؟؟؟؟؟

وأسئلة تانية كتييييييرة ملهاش حدود بس عايزين نركز علي حاجة مهمة هتجيب حاجات كتير معاها وهي..الصلاة

لما تبدأتسأل نفسك وتحاسبها وتأنبها ع الصلاة..وتبدأتصلي واحدة واحدة ..هتلاقي نفسك بتذكر ربنا كل لما تصلي..دى حاجة

تاني خطوة:ازاي أساعد نفسي اني اصلي؟؟

اقولك علي حاجة من وجهه نظري انا شخصياً..ان لازم ويمكن انا ذكرت ده قبل كده..علشان تعمل اي حاجة كويسة خاصةً في العبادات..لازم ولابد تذكر نفسك..انه في ربنا شايفاك وفيه حاجة اسمها موت..يعني انك لازم تعمل كل حاجة صح وبأخلاص..لان الموت مفيهوش رجوع..................

تالت خطوة واهم خطوة:أحاول اوفر لنفسي الجو المناسب انى اكون زي ما انا عايز!!!!!!!

هتقولولي..يعني ايه..اقولك يا سيدي..يعنى مثلاً ما كونش عايز ابطل سجاير واروح اقعد ع القهوة...ولا تكوني عايزة تلبسي محترم وتمشي مع ناس لبسهم مش محترم..نفس القصةما كونش عايز أصلي وألتزم واروح اقف مع ناس ولا مؤاخذة بتسمع الاذان ونفسها تسد ودانها

بالعكس ده مفروض انا اعمل حاجة من الاتنين

يا إما أخدهم معايا ونروح نصلي جماعة...وأحاول معاهم مرة واتنين وعشرة...لو منفعش..يبقي اهرب بجلدي أحسن ياخدونى ف سكتهم يا عم...

وبس كده خلاص هي دي الخطوات شوفتوا اسهل من كده...ونصيحة اخيرة علشان منقطعش ف الصلاة خلينا دايماً نفتكر مع بعض اننا بكده بنغيظ كائن اسمه الشيطان

واشوفكوا علي خير ف الموضوع اللي جاي

بس ياريت ما تنسوش التعليقات والاقتراحات..لا تترك الموضوع بلا تعليق وكن انسان ذا راي مفيد

السلام عليكم ورحمه الله وبركاته
الي اخواتى ف الله
انهارده عايزة اعمل معاكم استفتاء بسيط ف الموضوع القادم

1-الصلاة
2-التدخين واضراره وكيفية الاقلاع عنه
3-غض البصر..مشكلة العصر
4-حب النبي صلي الله عليه وسلم
5-تنظيم اوقاتنا للعبادة الصحيحة
6-قرآننا

ومواضيع تانية كتيرة...بس ناقصنى اقتراحتكم...وتعليقتكم

ف رعاية الله

التوبة

بسم الله الرحمن الرحيم

وبه نستعين ..والصلاة والسلام عليك يا سيدى يا رسول الله وعلي اله وصحبه ومن اتبعه الي يوم الدين..أما بعد

موضوعنا اليوم يا اخواتى واخوتى ف الله هو عن التوبة

ولكن قبل ان نخوض في اي موضوع أود ان اطرح علي نفسي قبل ان اطرح عليكم ..سؤالا هاما..هل سألنا انفسنا يوما ما معنى اننا نشهد ان لا اله الا الله وان محمدا رسول الله؟؟؟؟؟؟؟؟؟؟؟؟

ماذا ستكون اجابتنا اذا سالنا احدا يوما هذل السؤال؟؟؟؟؟

ماذا سيكون حالنا يوم العرض علي الرحمن عندما نسال هذا السؤال؟؟؟؟؟؟؟؟

الاجابة سهلة ولكنها لم تخطر علي بالنا في يوم من الايام..........

وهي ان لا معبود بحق الا الله واركانها اثنان نفي واثبات ,نفي جميع ما يعبد من دون الله وثبات العبادة لله وحده لاشريك له في عباداته وليس له شريك في ملكه.

وان محمدا رسول الله علينا طاعته فيما امر وتصديقه فيما اخبر واجتناب ما نهي عنه.

اما الان فسندخل في موضوعنا حتى لا اكون قد اطلت عليكم في هذه المقدمة

موضوعنا عن التوبة وقبل ما قول يعنى ايه توبة..عايزة اقول احنا يا تري ليه هنتوب؟؟؟؟؟؟؟؟

يعنى مثلا ممكن حد اول ما يقرا التوبة.. يقول ما انا كه كويس بصلي واصوم رمضان ومبزعلش ح منى ..وانا كده احسن من ناس كتير

لكن استنى..بص ياسيدى

ناس كتير بتصلي وناس كتير بتصوم وعارفة انك هتقول يا ستى مش اللي ف سنى..هقولك لأ..ما تبصش ان ده بيصوم وده بييصلي.. بص مين اللي فعلا مهما يعمل بيحس انه معملش حاجة ..يعنى عندك ناس ممكن تكون كويسة جدا وعمرها ما شافت كده ودايما حاسة انها مقصرة..ودى النقطة ..احنا بنتوب لاننا احنا اللي متاجين ده.,. اتفقنا ..اتفقنا..نبدا بقي نبدا

اول حاجة: يعني ايه توبة؟؟؟؟؟؟؟؟؟

يعنى اننا نعرف احنا بنعمل ايه غلط ونحط ايدينا عليه واعاهد ربنا قبل نفسي انى مش ده تانى.. بس بشرط اكون عارة ان ده فعلا غلط وا الحاجة دى مهما كانت فهي ممكن خلينى اروح النار.. يعنى كده نقدر نقول ان التوبة هى اننا نبطل واحدة واحدة كل حاجة غلط ف حياتنا ونصحح غلطنا ..ولا احنا مش عايزين ندخل الجنة..ايه رايكم؟؟؟؟؟؟؟؟؟
اكيد كنا عايزين ندخل الجنة..لكن السؤال هنا مين اللي بيعمل علشانها؟؟؟؟؟؟؟؟

يعنى مش بس صلاة..ده لازم يبقي فيه خشوع..ومش بس صيام وجوع..ده لازم يكون فيه نيه وخضوع لامر رسولنا الكريم عليه الف صلاة وسلام..ومش بس تأمر بالمعروف والسلام..ده لازم يكون عندنا غيرة ع الاسلام..وحاجات كتيرة جدا هنتكلم علي كل حاجة لوحدها .

لكن صراحة اللي خلانى اتكلم عن التوبة انهارده انى خلاص العلامات بتخبط ع الباب ولو محدش فتح لها.. هتكسر الباب.

ومن العلامات دى اللي ظهر واللي لسه مظهرش لكن ظاهر ظاهر

*علو اهل الفسق ف المساجد وظهور اهل المنكر علي اهل المعروف..ودى ظهرت

*ترى الحفاه العراة رعاه الشاه يتطاولون ف البنيان

وهم العرب البدو صاروا في اعظم فنادق اوروبا وامريكا واعلو عندهم البناء كما اخبر النبي (ص)...ودى ظهرت

*الدجالون...ودى ظهرت

*حتى يقبض العلم

وهى ان الناس تترك العلماء وتسأل الجلهاء وتستفتيهم وتصدقهم...ودي ظهرت

*كثرة الزلازل..ودى ظهرت

*تقارب الزمان

اى اننا نشعربأن السنة كشهر والشهر كأسبوع ولاسبوع كيوم واليوم كما يقع ورق الشجر ف الخريف..ودي ظهرت

*تقلب الانسان بين اليمان والكفر من كثرة الفتن...ودى كمان ظهرت

اما تطفينا كل تلك العلامات التى تنبأنا بأن يوم القيامة آت آت ..والعلامات تنبهنا وتصرخ في وجوهنا ..الن نتوب ..الن نتوب..الي متى سنظل مستمعين لكلام الشيطان ونصائحه بأن لانصلي فالعمر طويل ..وان لا نزكي فالمال قليل.. وان لا نصوم فالصحة لاتحتمل..الي متى يا اخواتى..الن نفوق ..الن نصرخ فيه ونقول له كفي..ونمسك بأيدى بعضنا ونتحداه ونقرا قراننا ونصلي لربنا ونزكي عن اموالنا وصحتنا وكل ما نملك ..الم تستمع الي قول رب العزة’’ألا تقتلون قوما نكثوا ايمانهم وهموا باخراج الرسول وهُم بدءوكم اول مرة اتخشونهم فالله أحق إن كنتم مؤمنين‘‘ التوبة-اية 13

واما سمعت قول الله تعالي"وإذا سألك عبادي عنى فإنى قريب أُجيب دعوة الداعٍ إذا دعانِِ فليستجيبوا لي وليؤمنوا بي لعلهم يرشدون" صدق الله العظيم

ف يا اخي إن الله غفور رحيم وينتظر كل عباده ليتوبوا..ولكن كل اللي انا عايزة اقوله هو ان احنا عايزين نلحق نفسنا بسرعة قبل ما يجى اليوم اللي ما فيش فيه رجوع ولا اعتذار ..يوم ما تقبض روحنا ويبقي يلا ..سلااام

نيجى بقي لتانى حاجة: ايه هي شروط التوبة؟؟؟

1. اننا اولاً نعرف احنا بنعمل ايه غلط
2. نأخد عهد علي نفسنا اننا نبطل الغلط ده
3. ما نرجعش نعمل الغلط ده مهما كانت العواقب
4. ندعي دايما ربنا انه يغفر لنا ويكو معانا

ومش عايزة اطول عليكم اكتر من كده ..لكن بجد والله العظيم انا عايزة اقولكم علي حاجة دايما بعملها مع نفسي علشان تتأدب..يا جماعة لازم دايما علشان ما نعملش الغلط..اننا نحط الموت ادام عنينا..هتلاقي نفسك مع الايام كل ما تيجى تعمل حاجة غلط بتقولك..طيب وافرض موت دلوقتى..يبقي ايه موقفك؟؟؟؟

يعنى عايزين بجد نتوب توب ما نرجعش فيها ابدا ..بس خلاص

وبجد بتمنى من الله ان لا اكون اطلت عليكم.. ورجائى منكم ان ترسلوا الي اقتراحاتكم لموضوعنا التالي لنتحدث فيه ونتناقش فيه ومن مر بتجربة أرجو ان يعرضها علينا ..والله الموفق لي ولكم

مقدمة

السلام عليكم ورحمه الله وبركاته ..معكم اختكم ف الله نسمة ..لقد احببت كثيرا ان اتواصل مع اناس احبهم ف الله ويحبوننى واتمنى من الله ان تنال هذه المدونة اعجابكم واسعد جدا بارائكم ومقترحاتكم...فلقد جمعنى بكم الان حبي لكم دون ان اعرفكم واتمنى من الله ان تبادلوننى نفس الشعور..وباذن الله سيون كلامنا ومواضعنا كثيره وارجو ان تكون مهمة وان تنال اعجباكم
أما عن نفسي فاسمي نسمة وأدرس بكلية التجارة جامعة القاهرة -سنة اولي
وأحب جدا القراءة وأكتب الشعر
وهذه نبذة عنى ومن اراد ان يسألنى اي سؤال فانا بان الله مستمعة له ومجيبة
واتمنى من الله ان يكون قد اعجبكم كلامى وان تسعدونى دائما بزيارتكم وارائكم

والله الموفق لي ولكم